Ahmad Nadeem Qasmi

اپنے ماحول سے تھے قیس کے رشتے کیا کیا

دشت میں آج بھی اٹھتے ہیں بگولے کیا کیا

عشق معیار وفا کو نہیں کرتا نیلام

ورنہ ادراک نے دکھلائے تھے رستے کیا کیا

یہ الگ بات کہ برسے نہیں گرجے تو بہت

ورنہ بادل مرے صحراؤں پہ امڈے کیا کیا

آگ بھڑکی تو در و بام ہوئے راکھ کے ڈھیر

اور دیتے رہے احباب دلاسے کیا کیا

لوگ اشیا کی طرح بک گئے اشیا کے لیے

سر بازار تماشے نظر آئے کیا کیا

لفظ کس شان سے تخلیق ہوا تھا لیکن

اس کا مفہوم بدلتے رہے نقطے کیا کیا

اک کرن تک بھی نہ پہنچی مرے باطن میں ندیمؔ

سر افلاک دمکتے رہے تارے کیا کیا

next

انداز ہو بہو تری آواز پا کا تھا

دیکھا نکل کے گھر سے تو جھونکا ہوا کا تھا

اس حسن اتفاق پہ لٹ کر بھی شاد ہوں

تیری رضا جو تھی وہ تقاضا وفا کا تھا

دل راکھ ہو چکا تو چمک اور بڑھ گئی

یہ تیری یاد تھی کہ عمل کیمیا کا تھا

اس رشتۂ لطیف کے اسرار کیا کھلیں

تو سامنے تھا اور تصور خدا کا تھا

چھپ چھپ کے روؤں اور سر انجمن ہنسوں

مجھ کو یہ مشورہ مرے درد آشنا کا تھا

اٹھا عجب تضاد سے انسان کا خمیر

عادی فنا کا تھا تو پجاری بقا کا تھا

ٹوٹا تو کتنے آئنہ خانوں پہ زد پڑی

اٹکا ہوا گلے میں جو پتھر صدا کا تھا

حیران ہوں کہ وار سے کیسے بچا ندیمؔ

وہ شخص تو غریب و غیور انتہا کا تھا

next

تو جو بدلا تو زمانہ بھی بدل جائے گا

گھر جو سلگا تو بھرا شہر بھی جل جائے گا

سامنے آ کہ مرا عشق ہے منطق میں اسیر

آگ بھڑکی تو یہ پتھر بھی پگھل جائے گا

دل کو میں منتظر ابر کرم کیوں رکھوں

پھول ہے قطرۂ شبنم سے بہل جائے گا

موسم گل اگر اس حال میں آیا بھی تو کیا

خون گل چہرۂ گلزار پہ مل جائے گا

وقت کے پاؤں کی زنجیر ہے رفتار ندیمؔ

ہم جو ٹھہرے تو افق دور نکل جائے گا

next

لب خاموش سے افشا ہوگا

راز ہر رنگ میں رسوا ہوگا

دل کے صحرا میں چلی سرد ہوا

ابر گلزار پہ برسا ہوگا

تم نہیں تھے تو سر بام خیال

یاد کا کوئی ستارہ ہوگا

کس توقع پہ کسی کو دیکھیں

کوئی تم سے بھی حسیں کیا ہوگا

زینت حلقۂ آغوش بنو

دور بیٹھو گے تو چرچا ہوگا

جس بھی فن کار کا شہکار ہو تم

اس نے صدیوں تمہیں سوچا ہوگا

آج کی رات بھی تنہا ہی کٹی

آج کے دن بھی اندھیرا ہوگا

کس قدر کرب سے چٹکی ہے کلی

شاخ سے گل کوئی ٹوٹا ہوگا

عمر بھر روئے فقط اس دھن میں

رات بھیگی تو اجالا ہوگا

ساری دنیا ہمیں پہچانتی ہے

کوئی ہم سا بھی نہ تنہا ہوگا

next

تنگ آ جاتے ہیں دریا جو کہستانوں میں

سانس لینے کو نکل جاتے ہیں میدانوں میں

خیر ہو دشت نوردان محبت کی اب

شہر بستے چلے جاتے ہیں بیابانوں میں

اب تو لے لیتا ہے باطن سے یہی کام جنوں

نظر آتے نہیں اب چاک گریبانوں میں

مال چوری کا جو تقسیم کیا چوروں نے

نصف تو بٹ گیا بستی کے نگہبانوں میں

کون تاریخ کے اس صدق کو جھٹلائے گا

خیر و شر دونوں مقید رہے زندانوں میں

جستجو کا کوئی انجام تو ظاہر ہو ندیمؔ

اک مسلماں تو نظر آئے مسلمانوں میں